/ طيرى اللحوح!/
***********
دغدغ ف روحى بـلهـفـتـه:
فـضفـض..وبـاح
فــورانــه آسـى وحُـرقـِتــه
خـدش الجــراح
وانا لـسّه بلحـس حسرتى,
واكتم بصبرى انين بيشغى
جـوّه عضم الروح
طيرى اللحوح عاوز يبوح
باللى ف هواه
ناوى يفسًر حرقته
يُنكش شطوط الوادى يمكن
يتعتر ف حوريًَه أو جنيًَه
أو مارد حبيس بفانوس
مارد حسيس يفسًر لغوته
قلبى اللحوح تمتم , وقال
مين اللى كتم الفرح ف
قلوب الرجال
مين اللى فضًَى السكه/
للوطاويط
مين اللى جاب مساخيط
تعكًَر دنيتى
جوًَايا خاتم بالغويط على
على بسمتى
كُتر السؤال شقق حوافى
الحلم ف الموّال
دُرر الغناوى اتبعترت ف
الغمًَ والتأويل
وبقت حكاوى الليل تفاهه
ومسخرة وتوهان
حتى الخطاوى بقت شطط
وهدير من الاوهام
طيرى الجموح كشًَر وزام
قاللى اكتفيت احلام
ح انساك وح انسى الخوف
وح اخرج من جرايرك/
ديدبان
وأمدً شوفى وادغدغ الكتمان
وابدُر قطوفى على الغلابه
وكل شهم بيحرس القواديس
لسًَه الهاويس بيطفًَى جمر
القهر ويندًى العرق
ح يدوًى صوتى بدون قلق
ويندًِى ف المواليد
ويعيد نشيد الفرح من تانى
وح ابقى طوق الامل/غنًَيوه
ح يقولها الصغار ف العيد!
**************
الشاعر/أحمد عفيفي
مصر
ليست هناك تعليقات:
إرسال تعليق