ياكرونا مالك ومالي بقلم صبري عطوة خليل

ياكرونا مالك ومالي
إرحل بقا يالعين
وقفت ياهالك حالي
ومع بعض مش نافعين
صرفت كل رأسمالي
وصبحت أقول يا معين
على وقف الحال إللي جالي
والشهور إللي راحوا ضايعين
على آخر الزمن ياخالي
قعدنا بالبيوت صايعين
عواطلية والجيب خالي
وبدل الفاتورة سبعين
السجن حريمي ورجالي
لو قلنا مش دافعين
لبسنا القديم البالي
وبكره نمشي قالعين
ولا يوم خطر على بالي
نعيش كلنا مفزوعين
من فيرس بيقولوا سلالي
وعياله كمان بارعين
بقيت أخاف من خيالي
أحط رجلي وأعين
وخايف ألمس عيالي
شايفين بعضنا طواعين
ماأنا شايف الموت قبالي
والمقابر مش مساعين
الأذان سامعه بيلالي
بس الجمعة مش جامعين
أتلفت يميني وشمالي
قالولي ماهم ذايعين
رميت ع الأرض شالي
وقولت ياشماتت الملاعين
حلفت يمين بالعالي
دي غلطة من المذيعين
محبوسين أيام وليالي
والتواصل يدوب بالعين
أم العيال قسمالي
طبيخ وغسيل مواعين
وخط أحمر رسمالي
وشوك مابينا زارعين
مضى زمن الوصالي
يامصيبتي ل نكون راضعين
اللوم ماهو ع المبالي
اللوم على الفراعين
إرحل يا صاحب المعالي
بعيد عن السامعين
متشعبط ليه بحبالي
ماعندك الجبال واسعين
بأقولهالك بصوت عالي
والله لك ماراكعين
بالعند فيك وبتعالي
أدينا الشقا راجعين
نعوض خسايرنا ياضلالي
وشعار الرضا رافعين
أنا وكل الأهالي
ع المصنع والغيط طالعين
وأنا مسئول عن أفعالي
الكمامة مش خالعين
ماإحنا متكممين طوالي
ولسانا كمان بالعين
أموت وأنا بأعمالي
ولا نموت كلنا جايعين
بعنا الرخيص والغالي
وعيالنا مش بايعين
لا تخافوا على مصر ياغوالي
فيها آل البيت باتعين