مانيش ندمان إسماعيل الطواب

مانيش ندمان

إسماعيل الطواب

==================================
ولو قتلوني مية مرة
ما انيش خايف ولا ندمان
حلفت أحميك يا درة
وارفع راياتك الغالية
اموت وتعيشي كده حرة
وهامتك ف السما عالية
وأشوف الفرح في عنيكي
وغناويكي في كل مكان

ولو قتلوني مية مرة
مانيش خايف ولا ندمان

ومش ذنبي ولا ذنبك
نيران الغدر تدبحني
خسيس محسوب على أرضك
عاوز عودك يكون محني
وأنا الحارس على بابك
وتروح روحي فدا ترابك
وتعيشي العمر بشبابك
رغم أنف كل جبان

ولو قتلوني مية مرة
مانيش خايف ولا ندمان

وليه أخاف
ما كل حاجة مكتوبة
وانت يا أما عرفاني
ما هم قتلوني كام نوبة
وبردو رجعت من تاني
وكل الدنيا ما تليل
حرجعلك بفجر جديد
وروحي شمس في سماكي
موعداكي بلا مواعيد
تشق الليل مهما إن كان

ولو قتلوني مية مرة
مانيش خايف ولا ندمان

==================================
بقلمي
إسماعيل الطواب