إبني حبيبي✒ احمد عناني 💻

‏
إبنى حبيبى    ( الصورة من أعمالى بالألوان المائيه )
==========================
إبنى حبيبى وضنايا
ياسبب سَعدى وهَنَايا
إنت َ سَندى ف دُنياىا
ضَى عنيا اللى بَشوف بِيها
كل آمالى اللى باعيش ليها
وإنت صُغَير ياما لاعبتك
وعلى كِتَافى كانت شِيلتك
جوا عيونى كانت نومتك
ربيتك من رزق حلال
عمرى ف يوم مابَخلت بمال
عَرَفتك تعاليم الدين
منها الرحمه بالوالدين
لما كبرت شويه صاحبتك
عودتك انى اخد رأيك
يِبقَىَ الصدق معاك ف القول
خللى كلامك ف المعقول
ويكون صح وكله أصول
وكمان تِبقَىَ لصاحبك صاحب
وقت الشده تقوم بالواجب
وإوعاك تِنسى فضل الأم
جوا عنيك حطها واهتم
تِلقَىَ البَرَكه عليك حتعُم
خللى ضميرك دايما صاحى
إعمل خير ولربك راعى
ولا تِطمعش ف غيرك يوم
عِيش بقناعه الستر يدوم
لما دخلت الثانوى حلمت
ياما دعيت ربى وطلبت
واتمنيت اشوفك دكتور
ناجح ف المهنه ومشهور
علشان عندى سلامة نيه
حقق لى ربى الأمنيه
خلصت دراسة الكليه
تقدير عالى ومِيه المِيه
خَدت الطب كمان وجراحه
ومَليت قلبى سعاده وراحه
عَلشَان تِكمل فَرحتى بيك
نِفسى عروسه حلوه وشيك
وتكون وش السعد عليك
ربنا ياابنى يِبارك فيك
وانا طول عمرى راضى عليك
==============
( محمـد عنانى )